Oha Nganga’ay Kiso Misamaan Pakahera to So’linay a Pihakelongan?

1. Ccayay aca kora mipatirengan ni Yis a so’linay Kristokiyo. Misahatilaay haw i, nohatini ’dengan ccayay ’opo, ccayay a masacfangay a tamdaw, ko misaso’linay midoko to Kawas ci Yihofaan. (Yohani 4:23,24; Ifiso 4:4,5) O sowal no Fangcalay Cudad cuwaka ’aloman kora lomakatay toya saka tahada’ocaw a mimingay lalan sanay.—Matay 7:13,14.

2. Pairasolay ko Fangcalay Cudad, mapatay to ma^min koya misawawaan a sikawdan ikor, o mararaway kimad ato misafelitay to sapakafana’ ni Kristo a kananaman lisin oha papalidlid saan micomod i kasa kopang no Krisciyang. O roma tamdaw oha mamikayhid to tamdaw, toha sapihakelongaw cangraanan, ao cuwa ci Kristo kora mihakelongan. (Matay 7:15,21-23; Dmak 20:29,30) Pakayniay to hatiniay lalangiyan, ma’araway ita nohatini iraay ko ’alomanay a pihakelongan misao Kristokiyoay ko sakatomireng. Oha nganga’ay misamaan kita pafafida’ to so’linay a Krisciyang hani?

3. O tada ihkalay a tahapinangan no so’linay Krisciyang i, makakaolah cangra. (Yohani 13:34,35) Cuwaka picada cangra to mararaway sapakafana’, a miharateng to mikikakaay ko niyah to roma ’airangan tamdaw, hanaca cuwaka picada cangra to mararaway sapakafana’ toha sapika’intehaw to roma kitakit a tamdaw. (Dmak 10:34,35) Misahatilaay haw i, cuwa koha mami lienang to folaw cangra. Misafelitay toraan, o so’linay Krisciyang makakaolah cangra, hatila o malikakaay.—1 Yohani 4:20,21.

O so’linay Krisciyang oha makakaolah cangra, misa’aretengay to Fangcalay Cudad, misa’icelay mitosil to Hongti a Kitakit no Kawas.

4. O roma tahapinangan no so’linay pihakelongan i: Oya mihakelongay tamdaw tangongolay konoka pisa ’areteng to Fangcalay Cudad. O kimad no Kawas hananay nangra minengneng ko Fangcalay Cudad, pakaso’lin tora kihcod a sowal no Fangcalay Cudad. (Yohani 17:17; 2 Timoti 3:16,17) Misa’aretengay cangra to kimad no Kawas mikikakaay konika masakalimlaan to harateng anoca nanaman a lisin no tamdaw sanay koka pinegneg nangra. (Matay 15:1-3, 7-9) Misa’icelay cangra kala sakadadmak tora sapakafana’ no Fangcalay Cudad itini kalo ’orip nangra to romi’ami’ad. Misahatilay haw i, cuwaka tano sowal aca cangra, a ’caka tooren kora sowal.—Titus 1:15,16.

5. O so’linay pihakelongan oha mami’edir to ngangan no Kawas. (Matay 6:9) Ci Yis mipatnakay to ngangan no Kawas toha sakafana’aw no tamdaw. O so’linay Krisciyang oha mamihaen to dmak. (Yohani 17:6,26; Loma 10:13,14) O cima kora misa’icelay mitosil to ngangan no Kawas itini i pala iso hani?

6. O so’linay Krisciyang oha mamitosil to Hongti a Kitakit no Kawas. Ci Yis mihaenay to dmak. Malaliday milengo’ i tamdaw tora Hongti a Kitakit cingra. (Luka 8:1) Micolcolay to sikawdan cingra papitnak tora lihaf i paro no kakarayan. (Matay 24:14; 28:19,20) Tanoktokay a pakaso’lin ko so’linay Krisciyang too ’dengan o Hongti a Kitakit no Kawas koha papaira to sakadipayalaw no hkal.—’Olic 146:3-5.

7. O sikawdan ni Yis cuwaka pilingat tonini mali’angay a hkal. (Yohani 17:16) Cuwa koha mamicapid cangra to mirikecay dmak noniya hkal, hanaca cuwa koha mamicapid to lacongis noniya likakawa cangra. Oha mamiliyas cangra torira masaknaknaay tati’ihay pakayraan, kananaman a lisin ato waywayan noniya hkal. (Yakop 1:27; 4:4) Itini ilaloma’ noniya kahilahila a pihakelongan itira tora kaitiraan iso, oha mamahapinang iso cima kora pakatooray tora tahapinangan no so’linay Kristokiyo han?

Copyright © 2006 Watch Tower Bible and Tract Society of Pennsylvania. All rights reserved.