Дин шъыпкъэр сыдэущтэу къэбгъотыщта?

1. Хьисэ зы дин шъыпкъэ закъом илъапсэ ыгъэтІылъыгъ. Ащ пае непэ щыІэн фае зы цІыф куп, е зы организацие, Тхьэу Иеговэ фэлажьэу (Иуан 4:23, 24; Ефес 4:4, 5). Тхьэм и ГущыІэ къызэриІорэмкІэ цІыф бэ дэдэп гъашІэм игъогу бгъузэм рыкІохэрэр (Маттэ 7:13, 14).

2. Инджылым къэхъущтыр итхэгъагъ, апостолхэр зылІэкІэ Хьисэ зэхищагъэ зэІукІэм шІэныгъэ нэпцІхэмрэ Хьисэ игъогу рыкІохэрэм ямыхабзэхэмрэ къахэхьащтых. ЕтІани итхагъ, цІыф зырызхэр, шІошъхъуныгъэ зыгу илъхэр Хьисэ игъогу къызэрытращыщтыр, ежьхэм ягъогу зэрытрагъэхьащтыр (Маттэ 7:15, 21—23; Апостолхэм 20:29, 30). Джары дин бэ тычиристан аІоу щыІэ кІэхъугъэр. Сыдэущтэу къэпшІэщта Хьисэ игъогу шъыпкъэу рыкІохэрэр?

3. Хьисэ игъогу шъыпкъэу рыкІохэрэр анахь нафэу къызэрыпшІэнэу щыІэ нэшанэр — ежь цІыфхэм азыфагу шІулъэгъуныгъэ къабзэу илъыр ары (Иуан 13:34, 35). Ахэм алъытэрэп зы лъэпкъыр нахьи адрэ лъэпкъым нахь дэгъоу е цІыфхэр кІышъом ышъо елъытыгъэу зэтрафэу щытхэп. Ахэм етІани зырагъасэрэп нэмыкІ хэгъэгум щыщхэр алъэгъу мыхъоу (Апостолхэм 10:34, 35). Джащ пае Хьисэ игъогу шъыпкъэу рыкІохэрэр заохэм ахэлажьэхэрэп. Ахэр зэш-зэщыпхъум фэдэу зэфыщытых (1 Иуан 4:20, 21).

Хьисэ игъогу шъыпкъэу рыкІохэрэр шІу зэрэлъэгъух, Тхыгъэ ЛъапІэм лъытэныгъэ фашІы, Тхьэм и Пачъыхьэгъум икъэбарышІу цІыфхэм афаІуатэ

4. ЯтІонэрэ нэшанэр — Тхыгъэ ЛъапІэм шъхьэкІэфэныгъэшхо фэпшІыныр ары. Хьисэ игъогу шъыпкъэу рыкІохэрэм Тхыгъэ ЛъапІэр Тхьэм и ГущыІэу алъытэ ыкІи зэкІэ ащ итхагъэр ашІошъ мэхъух (Иуан 17:17; 2 Тимофей 3:16, 17). Тхьэм и ГущыІэр ахэм дэжь нахь мэхьанышхо иІ, цІыфхэм яхабзэхэмрэ ягупшысэхэмрэ анахьи (Маттэ 15:1—3, 7—9). Ахэр сыдигъуи Тхыгъэ ЛъапІэм къыІорэмкІэ псэунхэу егугъух. ЯгущыІэхэри, яІофхэри зэтекІыхэрэп (Тит 1:15, 16).

5. Дин шъыпкъэм готхэр Тхьэм ыцІэ агъэлъэпэн фае (Маттэ 6:9). Хьисэ цІыфхэр ыгъасэщтыгъэх Иеговэ — Тхьэм ыцІэу зэрэщытыр. Хьисэ игъогу шъыпкъэу рыкІохэрэм ар дэдэ ашІэн фае (Иуан 17:6, 26; Рим 10:13, 14). Хэта о узщыпсэурэ чІыпІэм Тхьэм ыцІэ цІыфхэм афэзыІуатэрэр?

6. Хьисэ игъогу шъыпкъэу рыкІохэрэр цІыфхэм Тхьэм и Пачъыхьэгъум ехьылІагъэ къэбарышІур щагъэІун фаеу щыт. Джаущтэу Хьисэ ышІэщтыгъ. Ар сыдигъуи Тхьэм и Пачъыхьэгъу пае цІыфхэм афиІуатэщтыгъ (Лука 8:1). Хьисэ игъогу тетхэм унашъо аритыгъ а къэбарышІур чІылъэм тыдэкІи щагъэІунэу (Маттэ 24:14; 28:19, 20). Хьисэ игъогу шъыпкъэу рыкІохэрэм ашІошъ мэхъух Тхьэм и Пачъыхьэгъо закъор ары чІыгум мамырныгъэрэ щыІакІэшІурэ къытезгъэуцощтыр (Сэбур 146:3—5).

7. Хьисэ иеджакІохэр мы дунае Іаем иІофхэм ахэлажьэхэрэп (Иуан 17:16). Ахэр ахахьэхэрэп политическэ Іофхэм ыкІи социальнэ зэшІонэныгъэхэм. Ахэмэ мы дунаем щызекІорэ зекІуакІэ Іаехэр, хабзэхэр, гупшысэхэр къызхагъафэрэп (Якъуб 1:27; 4:4). Дин куп горэ ошІа, мы зигугъу къэтшІыгъэ Хьисэ игъогу шъыпкъэу тетхэм янэшанэхэр ахэлъэу?

Copyright © 2009 Watch Tower Bible and Tract Society of Pennsylvania. All rights reserved.