Шъыпкъэр
пшIэнэу уфая?

СЫДЫМ ехьылIагъэ шъыпкъэр? ЦIыфхэм анахь зыгъэгумэкIырэ упчIэхэм апае. ЗыгорэкIэ ори афэдэ упчIэхэр уиIэщтыгъэ:

О къызэрэпшIошIырэмкIэ мы упчIэхэм яджэуапхэр тыдэ узыщылъыхъон фае? Библиотекэхэмрэ тхылъ зыщащэрэ тучанхэмрэ тхылъ мин пчъагъэ къычIэбгъотэщт а джэуапхэр арыт фэдэу. Ау нахьыбэмкIэ джэуапэу арытхэр зэтекIых. НэмыкI тхылъхэм шъыпкъэр арыт фэдэу къыпщэхъу, ау уахътэр зытекIыкIэ ащ итхагъэ еплъыкIэхэр жъы мэхъужьых, тхылъхэр зэблахъужьых е кIатхыкIыжьых.

Ау цыхьэ зыфашIырэ тхылъ горэ щыI джэуап шъыпкъэхэр итхэу. А тхылъым егъашIэми уигъэпцIэщтэп. Пегъэмбар Хьисэ тхьэлъэIум хэтэу ыIуагъ: «О уигущыIэхэр ары шъыпкъагъэу щытхэр» (Иуан 17:17). Непэ Тхьэм игущыIэхэр Тэуратым, Сэбурым, Инджылым итхагъэх. Адрэ нэкIубгъохэм уяджэмэ джэуап гъэнэфагъэхэр, шъыпкъэхэр Тхьэм и ГущыIэм итхагъэхэр кIэкIэу къэпшIэщт.

Тхьэм шIу телъэгъуа?

СЫД ПАЕ АФЭДЭ УПЧIЭР КЪЫКIАТЫРЭ. Мы дунае тызыщыпсэурэм жъалымыгъэрэ мызэфагъэрэ бэу щыI. Дин нахьыбэмэ рагъаджэ цIыфхэм якъинхэр Тхьэм дэжь къикIыхэу.

ТХЬЭМ И ГУЩЫIЭ СЫД КЪЫIОРЭ. Мыхъунэу щыIэр егъашIэми Тхьэм дэжь къикIырэп. «Тхьэ шъыпкъэр IаягъэкIэ зекIошъущтэп ыкIи ЛъэкIыныгъэшхо зиIэм мызэфагъэ къыхэфэщтэп!»,— итхагъ Тхыгъэ ЛъапIэм (Аюб 34:10). Дунаем тет бзэджагъэри къин щэчыныгъэри Тхьэм тригъэкIодыкIыщт. Ащ пае пегъэмбар Хьисэ Тхьэм узэрелъэIун фаер цIыфмэ аригъашIэщтыгъ: «О Тятэ лъапIэу уашъом щыIэр!... Уи Тетыгъошхо къэрэкIу. Узыфаер уашъом зэрэщыхъурэм фэдэу, чIылъэми щэрэхъу» (Маттэ 6:9, 10). Тхьэм ащ фэдизэу шIу тызэрилъэгъугъэм къыхэкIэу, ежь игухэлъхэр зэригъэцэкIэным пае, осэшхо зыфишIырэ ытыгъ (Иуан 3:16).

Ащ нэмыкIэу еплъ 1 Мусэ 1:26—28; Якъубэ 1:13; 1 Петрэ 5:6, 7.

Зэгорэм заохэмрэ къин щэчыныгъэмрэ щымыIэжьхэу хъущта?

СЫД ПАЕ АФЭДЭ УПЧIЭР КЪЫКIАТЫРЭ. Заохэм цIыф бэ дэдэ ахэкIуадэ. ЦIыф щыIэп къиныгъо къынэмысыгъэу.

ТХЬЭМ И ГУЩЫIЭ СЫД КЪЫIОРЭ. Тхьэм къеIо уахътэ къэкIощт зэрэдунаеу мамыр зыщышIыщтыр. Тхьэм итетыгъо къызысыкIэ цIыфхэр «зэонхэу зэрагъэшIэщтхэп». Ахэмэ «ячатэхэм пхъэIашэхэ хашIыкIыжьыщтых» (Исайас 2:4). Къин щэчыныгъомрэ мызэфэныгъэмрэ Тхьэм чIыгум тригъэкIодыкIыщт. Инджылым тыкъегъэгугъэ: «[Тхьэр] ахэмэ анэхэм нэпс пстэури акIилъэкIыкIыжьыщт. ЛIэныгъэри щыIэжьыщтэп, шъыгъонри, гъынри, узри щыIэжьыщтхэп, сыда пIомэ ыпэрэ Iофхэр [мызэфэныгъэри, къин щэчыныгъори дыхэтэу] щыIэжьхэп» (Iофхэу 21:3, 4).

Ащ нэмыкIэу еплъ Сэбур 37:10, 11; 46:9; Михэ 4:1—4.

ЦIыфыр зылIэкIэ сыда хъурэ?

СЫД ПАЕ АФЭДЭ УПЧIЭР КЪЫКIАТЫРЭ. Дин нахьыбэмэ рагъаджэ цIыфыр лIэмэ нэмыкI чIыпIэ щыпсэу фэдэу. ЦIыфыбэмэ ашIошъ мэхъух лIагъэхэр псэухэм язэрар рагъэкIэу ыкIи цIыф бзаджэхэр Тхьэм джэхьнэмым егъакIохэу, япсэкIодхэр аригъэпщыныжьынэу.

ТХЬЭМ И ГУЩЫIЭ СЫД КЪЫIОРЭ. ЦIыфыр лIэмэ ищыIэныгъэ ащ щэухы. «ЛIагъэхэм зи ашIэрэп»,— Тхьэм и ГущыIэм къеIо (Экклезиаст 9:5). ЛIагъэхэм зи ашIэрэп, зи зэхашIэрэп, ащ къыхэкIэу ахэмэ яшIуагъи, язэрари къытагъэкIышъущтэп (Сэбур 146:3, 4).

Ащ нэмыкIэу еплъ 1 Мусэ 3:19; Экклезиаст 9:6, 10.

Тиблагъэ лIагъэхэр тлъэгъужьыщтха?

СЫД ПАЕ АФЭДЭ УПЧIЭР КЪЫКIАТЫРЭ. ЗэкIэми тыпсэунэу тыфай ыкIи шIу тлъэгъухэри тигъусэу къытдэтхъэнхэу. ГъэшIэгъонэп, тиблагъэ лIагъэхэр лъэшэу тлъэгъунэу тызэрыфаер.

ТХЬЭМ И ГУЩЫIЭ СЫД КЪЫIОРЭ. ЦIыф лIагъэхэм янахьыбэ Тхьэм псэунхэу къыгъэтэджыжьыщтых. Пегъэмбар Хьисэ ыIогъагъ «къэхэмэ ачIэлъ пстэури... псэунхэу къызэрытэджыжьыщтхэр» (Иуан 5:28, 29). Къэтэджыжьыщт цIыфхэр джэнэт чIыгум щыпсэущтых Тхьэм иапэрэ гухэлъ зэриIагъэм фэдэу (Исайас 65:21—25). Ащ нэмыкIэу, Тхьэм едэIурэ цIыфхэр узыр зыфэдэ амышIэу, мылIэжьэу егъашIэми псэущтых. Тхьэм и ГущыIэм итхагъ: «Шъыпкъагъэ зыхэлъ цIыфхэр чIыгур къалъыIэсыщт ыкIи егъашIэми ащ щыпсэущтых» (Сэбур 37:29).

Ащ нэмыкIэу еплъ Аюб 14:14, 15; Лука 7:11—17; Апостолхэм 24:15.

Тхьэм укъызэхихынэу сыдэущтэу уелъэIун фая?

СЫД ПАЕ АФЭДЭ УПЧIЭР КЪЫКIАТЫРЭ. Дин зэфэшъхьаф хэт цIыфхэр Тхьэм елъэIух. Ау нахьыбэмэ ятхьэлъэIухэм Тхьэм джэуап къаритэу алъэгъурэп.

ТХЬЭМ И ГУЩЫIЭ СЫД КЪЫIОРЭ. Пегъэмбар Хьисэ тхьэлъэIум ехьылIагъэу тигъэшIагъ «бащэ тымыIонэу» цIыфыбэмэ «гущыIабэ къызэраIорэм» фэдэу (Маттэ 6:7). Ащ къикIырэр титхьэлъэIухэр езыбырэу къыкIэтымыIотыкIыжьынэу. Тхьэм титхьэлъэIухэр къызэхихынэу тыфаемэ, ежь зэрыфаем тетэу телъэIун фае. Ащ пае зэдгъэшIэн фае сыдэущтэу Тхьэм телъэIун фае титхьэлъэIухэр зэхихынэу. КъэбарышIум итхагъ: «Тхьэр зэрэфаем тетэу зыгорэкIэ телъэIумэ, къызэрэтэдэIущтыр тэшIэ» (Иуан 5:14).

Ащ нэмыкIэу еплъ Сэбур 65:2; Иуан 14:6; 16:23, 24; 1 Иуан 3:22.

ЩыIэкIэ насыпышIу сыдэущтэу бгъотыщта?

СЫД ПАЕ АФЭДЭ УПЧIЭР КЪЫКIАТЫРЭ. ЦIыфыбэмэ ашIошъ мэхъу насыпыр зэлъытыгъэ ахъщэ уиIэмэ, цIэрыIоу ухъумэ е удахэмэ. Ахэмэ зэрафэлъэкIэу ахъщэр, цIэрыIор, дэхагъэр зырагъэгъоты, ау ащ пае нахь насыпышIоу хъухэрэп.

ТХЬЭМ И ГУЩЫIЭ СЫД КЪЫIОРЭ. Пегъэмбар Хьисэ къытигъэшIагъ насып шъыпкъэр сыда зэпхыгъэр. Ащ ыIуагъ: «Тхьэм игущыIэхэр зэхэзыхэу, ахэри зыгъэцакIэрэр... сыхьатмафэ ежьагъэх» (Лука 11:28). Насып шъыпкъэр дгъотынэу тыфаемэ, нахь щыкIагъэ инэу тиIэр зэдгъэгъотын фае. Нахь щыкIагъэ иныр — Тхьэм ехьылIагъэ шъыпкъэр ыкIи сыд пае тыкъигъэхъугъ тщIэнэу ары. А шъыпкъэр Тэуратым, Сэбурым, Инджылым итхагъ. Мы шъыпкъэр тшIэ хъумэ, къэтшIэщт тищыIэныгъэ ехьылIагъэу шъыпкъэ дэдэмкIэ сыда мэхьанэ зиIэмрэ зимыIэмрэ. Тхьэм и ГущыIэм ит шъыпкъэм тетэу тызекIомэ, тищыIэныгъэ нахь гушIуагъо хъущт.

Ащ нэмыкIэу еплъ ГущыIэжъхэу 3:5, 6, 13—18; 1 Тимофей 6:9, 10.