Lagoba-ni En Anga?

1. Lok man ni “lagoba”-ni gonnye ni ngat ma tito lok goba maraco i kom ngat mukene. “Catan” te lokke ni lamone nyo lajemo. Magi aye nying ma gimiyo bot lamone madit pa Lubanga. I kare mukwongo, en kong obedo lamalaika ma pe ki bal i polo kacel ki Lubanga. Ento, lacen en otamo dok ni edit tutwal ci ocako mito woro ma myero i atir-re gimi bot Lubanga aye.—Matayo 4:8-10.

2. Lamalaika man, Catan, oloko ki Kawa kun tiyo ki twol. Pi wacco bot Kawa lok goba, en omiyo Kawa ojemo i kom Lubanga. Kit meno Catan okelo pyem i kom gin ma kilwongo ni “twero me loc” pa Lubanga, nyo rwomme macalo Ngat ma Malo Twal. Catan okelo akalakala ni gwok nyo Lubanga pe loyo loc-ce i yo maber ki bene ni en pe loyo pi ber bedo pa jo ma En loyogi. Catan bene okelo akalakala ni dano pe romo bedo jo ma gicung tung bot Lubanga matwal. Pi timo man, Catan olokke pire kene odoko lamone pa Lubanga. Meno aye ma omiyo kicako lwonge ni Catan Lagoba-ni.—Acakki 3:1-5; Yubu 1:8-11; Niyabo12:9.

3. Catan temo me bito dano wek guwore. (2 Jo Korint 11:3, 14) Yo acel ma en bwolo kwede dano aye i dini goba. Ka dini mo pwonyo lok goba i kom Lubanga, nongo i ada-ne tiyo yub pa Catan. (Jon 8:44) Jo ma gin lumemba me dini me goba giromo tamo ki cwinygi ducu ni gitye ka woro Lubanga me ada. Kun i ada-ne nongo gitye katic pi Catan aye. En aye “lubanga me lobo man.”—2 Jo Korint 4:4.

Dini goba, tim tyet, ki cwakko rok mo rwenyo dano

4. Tim tyet obedo yo mukene ma Catan miyo dano bedo kwede i te twero-ne. Gin oromo lwongo jogi me gwokogi, me wano jo mukene, me titto jami ma bitimme i anyim, nyo me timo tango. Catan aye won teko macilo ma ocung i nge tim magi ducu. Me yomo cwiny Lubanga, myero pe wagud tim tyet.— Nwoyo Cik 18:10-12; Tic pa Lukwena 19:18, 19.

5. Catan bene bwolo dano i yo me wakke ma okato kare pi rangi del-kom ki me keto gen mukato kare i kom yub mogo me loc pa dano adana. Jo mogo gitamo ni rok-gi nyo jo me rangi del-komgi loyo jo mukene-ni. Ento man pe atir. (Tic pa Lukwena 10:34, 35) Jo mukene keto gen-gi i kom yub me loc pa dano me cobbo peko pa dano. Pi timo kit meno, gin gitye ka kwero Ker pa Lubanga woko. En ker-ri kene aye ma bicobbo pekowa.—Daniel 2:44.

Jem i kom Catan kun imedde ki pwonnyo lok i kom Jehovah

6. Yo mukene ma Catan bwolo kwede dano aye me bitogi ki miti maraco. Jehovah wacciwa ni waweku tim me bal pien en ngeyo ni tim magi biwanowa. (Jo Galatia 6:7, 8) Jo mogo giromo mito ni iribbe kwedgi i tim ma kit meno. Ento, myero wii opo ni, Catan kikome aye mito ni in itim jami magi.—1 Jo Korint 6:9, 10; 15:33.

7. Catan oromo tic ki auna-una nyo pyem wek iwek Jehovah. Jo mogo i kin jo ma imarogi guromo keco matek pien itye ka kwano Baibul. Jo mukene guromo ngallo in. Ento anga ma tye ki twero i kom kwo-ni? Catan mito ni ekel lworo i cwinyi wek in ijuk pwonnyo lok i kom Jehovah woko. Pe iwek Catan olo! (Matayo 10:34-39; 1 Petero 5:8, 9) Pi jemo-ni i kom Lagoba, ibitwero miyo cwiny Jehovah bedo yom kun inyuto ni in icwako twero me loc ma Mege.—Carolok 27:11.

Copyright © 2008 Watch Tower Bible and Tract Society of Pennsylvania. All rights reserved.